Ngā Karere

Kotahi te toitoi e hia ngā inanga ka kai.

 

Na Ngāti Hinerangi, Ngāti Hinekiri te reo karanga ki te iwi, mo te whakanui i te tūwheratanga o te wharenui o Rangitihi, ki te marae o Taheke, ki te pā whakahirahira o Ōpātia. 

 

E ai ki te heamana o te marae a Piki Thomas, kua roa ngā whānau me ngā hapū e tatari ana ki tēnei rangi whakahirahira. 

 

“Tata ki te rua tau ngā whatu o te whare tūpuna nei e moe ana, ā, nā te whakarewatanga me te whakaohonga o te wharenui e hūrō ana ngā whānau i tēnei rā.”

 

Ko te take nui o ngā mahi whakatikatika, nā te pirau hāere o ngā pātū, ngā pakitara, me te waikura ō roto i ngā whakairo a ngā tūpuna.

 

E ai ki tā Thomas, he pai tēnei mahi mo te marae me ngā whānau e kimi mahi ana. Nā te nui o ngā mahi whakatikatika e āhei ana ngā uri ki te whai mahi ki tō rātou ake kāinga tūturu. 

 

I whai wāhi ngā rangatahi o te pā ki ngā mahi whakairo, ngā mahi whatu tukutuku, me ngā mahi whakapaipai. Ko te mīharotanga o te kaupapa nei, he kitenga i ngā rēanga katoa e ū ana ki ngā mahi, tamariki mai, kaumātua mai.

 

“Nā te whakaaro nui o te komiti whakahāere ki te whaka paipai i te wharenui, me te pūtea tautoko a te kāwanatanga i ū tahi ai ngā whānau, me ngā hapū ki te whakatika i tō mātou whare tūpuna.”

 

Kua tae te wā ki ngā whānau ki te hoki ki te marae, ā, nā te whakatūwheratanga o ngā tatau o te whare tūpuna e tāea ana ki te hoki atu.

 

He wā tēnei ki te mahi i ngā mahi, akoako i ngā waiata me ngā whakapapa me te tino whāinga o te wā, he whakariterite mo te hui ahurei o Ngāti Pikiao e haere ake nei. 

Hei apōpō ka tū te Poukai ki rō te whare, hei whakanui i ngā hononga o Ngāti Pikiao ki te Kīngitanga, ki te whakanui i tā Kīngi Tūheitia me te Kāhui Ariki.

 

E ai ki tā Piki Thomas, ka rerekē te Poukai i tēnei tau, nā te āwangawanga mo ngā kaumātua, me ngā tamariki mokopuna i ēnei wā o te Kōwheori-19.

 

“He hui pakupaku noa iho i tēnei wā, ki te whakāro nui ki ō tātou kaumātua, me ngā rēanga e ara tonu nei.”

 

“Ko te whakahirahiratanga o te hui, he whakanui ia Kīngi Tūheitia me te Kāhui Ariki, ki te whakanui hoki i tō tātou kuia a Kui Kawekura”.

 

Ngāti Hinerangi Ngāti Hinekiri, ngā toioi tiaki i te awa o Okere.

 

 

Waimanea Nuri, Te Reo Irirangi o Te Arawa

©2024 Te Arawa. All rights reserved.
 

Log in with your credentials

Forgot your details?